Pòtoprens, 17 septanm – Òganizasyon Entènasyonal pou Migrasyon (OIM) lanse « Alo Enfo », yon kanpay enfòmasyon piblik nan vil ki sou fwontyè ant Ayiti ak Repiblik Dominikèn, ki vize amelyore aksè migran Ayisyen yo pou yo gen dokiman idantite ak vwayaj ki esansyèl. Inisyativ sa a sipòte gouvènman Ayisyen an nan jefò pou asire migran yo gen dokiman legal ki nesesè pou pwoteje dwa yo epi fasilite migrasyon an sekirite, nan lòd ak anba lalwa. 

Selon remak, chèf misyon OIM an Ayiti, Grégoire Goodstein : « Migran yo souvan rankontre difikilte pou jwenn dokiman yo bezwen pou vwayaje, sa ki rann yo ekspoze ak eksplwatasyon yo, trafik moun, anplis anpeche yo gen aksè ak sèvis Leta yo. » Li kontinye pou li di : « Kanpay sa a la pou sansibilize migran yo jwenn enfòmasyon yo bezwen pou yo sa jwenn dokiman idantite yo, ki esansyèl pou sekirite yo ak pou dwa yo. » 

Alo Enfo, ki vle di « rele pou enfòmasyon », sèvi ak radyo, yon resepyon apèl gratis, rezo sosyal ak sansibilizasyon kominotè pou mete aksan sou enpòtans dokiman idantifikasyon tankou paspò, ekstrè dachiv ak kat idantifikasyon nasyonal. Kanpay la bay enfòmasyon klè kou dlo kòk sou fason pou jwenn dokiman sa yo nan sant resepsyon ak livrezon dokiman idantite yo (CRLDI) ki jwenn sipò OIM. Sant sa yo pral gen nouvo pano afichaj ak sinyalizasyon nan objektif pou fasilite aksè popilasyon Ayisyèn lan ak sèvis idantite.  

Kòm diplis ak kanpay sila a, OIM sipòte enstitisyon Leta yo pou l pèmèt yo louvri nouvo CRLDI nan peyi an. Sipò sa gen ladan l reparasyon enfrastrikti ki egziste deja, èd materyèl, teknik ak lojistik pou sèvis yo mache. Sa fèt atravè don ekipman ak transpò dokiman idantite soti nan kapital lan bout nan rès peyi an. Apwòch stratejik desantralizasyon sèvis idantite legal sa sible sitou zòn ki sou fwonyè, zòn ki gen anpil moun ki deplase. Demach sa se fasilite sila ki plis vilnerab yo tankou fanm, timoun ak moun k ap viv nan zòn fwontyè. 

Kanpay Alo Enfo sa finanse an pati gras ak Ajans peyi Koredisid pou Koperasyon Entènasyonal (KOICA) epi Biwo Popilasyon, Refijye ak Migrasyon Depatman Deta Ameriken, nan kad yon inisyativ laj pou ranfòse bon jan gouvènans sou migrasyon an Ayiti. 

Pou plis enfòmasyon : 

Ayiti : Antoine Lemonnier, +509 39 90 6920, alemonnier@iom.int